ဌာနပရေၚ်ပညာကောန်ဂကူမန် (ဗဟဵု) ဍိုက်ဍိုပ်တုဲ ပ္ဍဲကဵု စၟတ်တ္ၚဲ (၂၃၊၇၊၂၀၂၆) သက္ကရာဇ်ဍုၚ် ၁၃၈၈ သၞာံ၊ ဂိတုဒုတိယဒ္ဂိုန် ၉ မံက် ဂှ် ကၠောန်သ္ပလဝ်ကောံဓရီု သဳကၠဳပရေၚ်ပညာကောန်ဂကူမန် ဒၞာဲဘာ ဓမ္မရက္ခိတ၊ ကွာန်ပၞၚ်ဗိုန်၊ ဒေသကၞောတ်ၜဳရေဝ် ရ။ ညးတိုန်စိုပ်ဂမၠိုၚ် ဝွံ ဂကောံခမဳသၚ်ကျာ်ဇၞော်အာစာဂမၠိုၚ်၊ ဂကောံလျိုၚ်ပညာပွိုၚ်ဍုၚ်ကၞောတ်ၜဳရေဝ်၊ ဂကောံအုပ်ဓုပ်ကွာန်အလုံဒေသကၞောတ်ၜဳရေဝ်၊ ဂကောံအာစာဘာဂမၠိုၚ်၊ အာစာ/အာစာၝောံနူဘာဒေသကၞောတ်ၜဳရေဝ် (၁၂) ဘာ၊ ဂကောံညးဗြဴမန် ကေုာံ ဂကောံနာနာတအ် တိုန်စိုပ် ကောံဓရီု လၟိဟ်မၞိဟ် (၁၀၀) တၠပြၚ်နွံရ။ တၚ်နၚ်သဳကၠဳဂမၠိုၚ်ဝွံ
– သောၚ်ကလးစပ်ကဵုဗီုပြၚ်ဒက်ပ္တန် ပရေၚ်အုပ်ဓုပ်ဌာနပရေၚ်ပညာကောန်ဂကူမန်အဆံၚ်ဆံၚ် ကေုာံ ပရေၚ်ချဳဒရာၚ် ပရေၚ်ကမၠောန်နာနာ
– သောၚ်ကလးသဳကၠဳ စပ်ကဵုပရေၚ်ပညာကွးဘာတအ် ဗီုလဵုဂွံတတ်ကၠောံအာပရေၚ်ပညာသဇိုၚ် စဵုကဵုစိုပ် ပညာအဆံၚ်သၠုၚ်တုဲဒှ်အာ ဗွဲမစိုပ်တရဴမာန်
– ချပ်သဳကၠဳစပ်ကဵု ပရေၚ်စဵုဒၞာ ကောန်ၚာ် မဗ္တံကဵု သုၚ်စောဲဂဥုဲၜူမာဲကီု အယုက်ဟွံပေၚ် စှ်ေဒၞာဲပတူအိန်ထံၚ်တအ် နဲကဲလဵု ဂွံစဵုဒၞာအာမာန်ကီု
– ပံက်ဂကောံသြန်ဂအုံ ပရေၚ်ပညာ သွက်အလုံဒေသကၞောတ်ၜဳရေဝ်ရ။
ညးတိုန်စိုပ် ကျာ်ဇၞော်အာစာတၠကီု ဂကောံအုပ်ဓုပ်ကွာန်ကီု ဂကောံနာနာတအ်သီုဖအိုတ် ဘိုၚ်ပါလုပ်သဳကၠဳ ကဵုကသပ် ဗွဲမကတိုၚ်ကၟိုဟ်ဂှ် ဗွဲမမိပ်စိုတ် ဂွံဆဵုညာတ်ကေတ်ရ။
ကျာ်ဇၞော်ဘာဓမ္မရက္ခိတ ဘဒ္ဒန္တမှာထေရ်ဥတ္တမ ကီု ဥက္ကဌကွာန်ပၞၚ်ဗိုန် နာဲကြက်စၠန် ကေုာံ ဒကာဘာဂမၠိုၚ် သွက်ကောံဓရီုဂွံပြေပြံၚ်မာန် ဘိုၚ်ဖန်ဇန် ကဵု ဒၞာဲ သီုသွက်စသုၚ် သီုဖအိုတ်ဂှ် ဌာနပညာ (ဗဟဵု) ပိုဲ တၚ်ဏာဂုန် ဗွဲမဇြိုဟ်နက်ရကျာ်/အဴ။
